تلنگانہ میں شدید گرمی سے 4 افراد جاں بحق

تلنگانہ میں شدید گرمی اور تیز گرم ہواؤں (لو) نے عوام کی زندگی کو متاثر کر دیا ہے، جہاں دن کے درجۂ حرارت معمول سے کہیں زیادہ ریکارڈ کیے جا رہے ہیں۔ اس خطرناک صورتحال کے نتیجے میں لو لگنے سے 4 افراد کی موت واقع ہوئی ہے، جس نے مختلف اضلاع میں تشویش کی لہر دوڑا دی ہے۔

 

تفصیلات کے مطابق پدّاپلی ضلع کے منّتھنی منڈل کے چِنّا اوڈیلا گاؤں کے رہنے والے داسری رمیش (50) اور راجنا-سرسلہ ضلع کے بوئین پلی منڈل کے وینکٹ راؤ پلی کے نلالا موہن (46) مکان کی تعمیر کے دوران لو لگنے سے فوت ہوگئے

 

اسی طرح کاماریڈی ضلع کے یلاریڈی منڈل کے ادوی لنگال



گاؤں کے لنگال رامولو (59) کھیت کو پانی دینے گئے تھے کہ اچانک گرمی کی شدت سے بے ہوش ہوکر گر پڑے اور موقع پر ہی دم توڑ دیا۔

 

ادھر ورنگل ضلع کے نرسم پیٹ منڈل کے بوجیا نائک ٹنڈا کے رہنے والے بھوکیا جنکو (65) ہفتہ کی دوپہر باغ میں کام کرتے ہوئے لو لگنے سے گر پڑے۔ انہیں فوری طور پر اسپتال منتقل کیا گیا، تاہم ڈاکٹروں نے انہیں مردہ قرار دے دیا۔

 

محکمۂ موسمیات نے خبردار کیا ہے کہ آئندہ دنوں میں گرمی کی شدت مزید بڑھ سکتی ہے، جس کے پیش نظر عوام کو دوپہر کے اوقات میں غیر ضروری باہر نکلنے سے گریز کرنے، زیادہ پانی پینے اور احتیاطی تدابیر اختیار کرنے کا مشورہ دیا گیا ہے۔