گجرات: شادی سے ایک گھنٹہ قبل دولہے کے ہاتھوں دلہن کا قتل

ذرائع:

گجرات کے بھاؤنگر میں ایک افسوسناک واقعہ پیش آیا جہاں شادی سے صرف ایک گھنٹہ پہلے ہونے والے دلہے نے ساڑی اور پیسوں کے معاملے پر جھگڑے کے دوران اپنی ہونے والی دلہن کو قتل کر دیا اور موقع سے فرار ہوگیا۔ اطلاعات کے مطابق ساجن بریا اور سونی ہمتھ راٹھوڑ ایک دوسرے سے محبت کرتے تھے اور خاندان کی عدم رضامندی کے باوجود ڈیڑھ سال سے بغیر شادی کے ایک ساتھ رہ رہے تھے۔ دونوں نے باہمی رضامندی سے 15 نومبر کی رات شادی کی تاریخ طے کی، ویڈنگ کارڈس چھپوائے گئے اور مہمانوں کو



مدعو کیا گیا۔ ہفتہ کے روز شادی کی ابتدائی رسومات بھی مکمل کر لی گئیں اور تقریباً ایک گھنٹے بعد ان کی شادی ہونی تھی۔ اسی دوران ساڑی اور رقم کے مسئلے پر دونوں کے درمیان شدید بحث ہوئی۔ غصے میں آکر ساجن نے لوہے کی سلاخ سے سونی پر حملہ کیا اور اس کا سر دیوار سے ٹکرا دیا، جس سے وہ موقع پر ہی ہلاک ہوگئی۔ واردات کے بعد ملزم وہاں سے فرار ہوگیا۔ اطلاع ملنے پر پولیس موقع پر پہنچی اور نعش کو پوسٹ مارٹم کے لیے سرکاری اسپتال منتقل کیا۔ پولیس نے ساجن کے خلاف قتل کا مقدمہ درج کر کے تفتیش شروع کر دی ہے اور ملزم کی گرفتاری کے لیے کوششیں جاری ہیں۔