مرکزی وزیر کوشل کشور کے گھر میں گولی لگنے سے نوجوان کی موت

لکھنؤ: مرکزی وزیر کوشل کشور کے گھر پر ایک نوجوان کی مشتبہ حالت میں موت ہو گئی۔ لاش کے پاس وزیر کے بیٹے وکاس کشور کے نام پر لائسنس والی بندوق تھی۔ یہ واقعہ لکھنؤ شہر کے قریب ٹھاکر گنج تھانے کے تحت بیگریا گاؤں میں وزیر کی رہائش گاہ پر پیش آیا۔ پولیس نے متوفی کی شناخت ونے سریواستو وزیر کے بیٹے وکاس کشور کے دوست کے طور پر کی ہے۔

پولیس نے مقدمہ درج کر لیا ہے اور واقعہ کی تحقیقات کر رہی ہے۔ ڈاگ سکواڈ، کرائم برانچ پولیس اور فورنسک ٹیموں نے موقع پر جا کر شواہد



اکٹھے کئے۔ شبہ ظاہر کیا جا رہا ہے کہ وزیر کے بیٹے وکاس کشور نے اپنے دوست ونے سریواستو کو گولی مار دی ہو گی۔ لیکن وزیر کا کہنا ہے کہ واقعہ کے وقت ان کا بیٹا وکاس کشور گھر پر نہیں تھا۔

دوسری جانب وزیر کوشل کشور نے کہا کہ وہ ہر طرح سے متاثرہ خاندان کے ساتھ کھڑے ہوں گے اور اس بات کو یقینی بنائیں گے کہ کسی بھی مجرم کو سزا ملے۔ ٹھاکر گنج پولیس، جس نے معاملے کی جانچ شروع کی ہے، ابتدائی تفتیش کے بعد تین مشتبہ افراد کو حراست میں لے لیا ہے۔ جبکہ وزیر کے دوسرے بیٹے آکاش کشور کی موت 2020 میں شراب کی لت کی وجہ سے ہوئی تھی۔