بھینسہ: جھیل میں نہاتے ہوئے دو کمسن طلبہ ڈوب کر جاں بحق

تلنگانہ: بھینسہ ڈویژن کے موزوں کبیر گاؤں میں ایک دلخراش واقعہ پیش آیا، جہاں یلما جھیل، جسے ڈوڈرنا جھیل بھی کہا جاتا ہے، جس میں نہانے کے دوران دو کمسن طلبہ گہرے پانی میں ڈوب کر جاں بحق ہوگئے۔ مقامی ذرائع کے مطابق اسکول کی تعطیل کے باعث تین لڑکے جھیل میں نہانے کے لیے گئے تھے۔ ان میں ایک پرائیویٹ اسکول کا چوتھی جماعت کا 13 سالہ طالب علم گنیش، تیسری جماعت کا 10 سالہ طالب علم صوفیان اور ایک 8 سالہ لڑکا شامل تھا۔ بتایا گیا ہے کہ نہانے کے دوران گنیش اور صوفیان گہرے پانی میں چلے گئے اور ڈوب گئے۔ قریب



موجود ایک چرواہے نے انہیں دیکھا اور فوری طور پر جھیل سے باہر نکالنے کی کوشش کی، تاہم دونوں کو باہر نکالنے کے بعد وہ مردہ پائے گئے۔ واقعے کی اطلاع ملتے ہی بھینسہ اے ایس پی سائی کرن، آئی پی ایس، بھینسہ رورل سرکل انسپکٹر پروین کمار اور ایس آئی کرشنا ریڈی موقع پر پہنچے اور صورتحال کا جائزہ لیا۔ پولیس نے دونوں لاشوں کو ضروری طبی کارروائی اور پوسٹ مارٹم کے لیے بھینسہ گورنمنٹ ایریا اسپتال منتقل کردیا۔ پولیس نے واقعے کے سلسلے میں مقدمہ درج کرکے مزید تحقیقات شروع کردی ہیں۔ اس افسوسناک واقعے کے بعد علاقے میں غم کی لہر دوڑ گئی۔