لکھنؤ میں آوارہ گائے کا 5 سالہ بچی پر خوفناک حملہ، سی سی ٹی وی منظر عام پر

اتر پردیش کے دارالحکومت لکھنؤ کے ارجن گنج علاقے میں ایک افسوسناک واقعہ پیش آیا، جہاں ایک آوارہ گائے کے حملے میں پانچ سالہ بچی شدید زخمی ہوگئی۔ یہ واقعہ 31 جولائی کو اُس وقت پیش آیا جب پہلی جماعت کی طالبہ سنینا اپنے گھر کے باہر کھیل رہی تھی۔ سی سی ٹی وی فوٹیج میں دیکھا جا سکتا ہے کہ اچانک ایک گائے نے بچی پر حملہ کر دیا، اسے اپنے سینگوں سے دیوار کے ساتھ دبا دیا، پھر زمین پر گرا کر تقریباً ایک منٹ تک مسلسل کچلتی رہی۔ بچی کی چیخ و پکار سن کر مقامی



افراد فوری موقع پر پہنچ کر لاٹھیوں اور پتھروں کی مدد سے گائے کو وہاں سے بھگایا، جس کے بعد بچی کو شدید زخمی حالت میں اسپتال منتقل کیا گیا، جہاں اس کا علاج جاری ہے۔ بچی کے اہلِ خانہ کا کہنا ہے کہ علاقے میں آوارہ مویشیوں کی بھرمار ہے اور اس سے قبل بھی یہ جانور بچوں کا تعاقب کر چکے ہیں، تاہم ذمہداران نے اس مسئلہ  پر مؤثر کارروائی نہیں کی۔ میونسپل کارپوریشن کے ذمہداروں نے کہا کہ حملہ کرنے والی گائے کو   لاوارث چھوڑنے والے مالک کے خلاف بھی قانونی کارروائی کی جائے گی۔