فنانس بل لوک سبھا میں منظور

نئی دہلی ، 23 مارچ (یواین آئی) لوک سبھا نے بجٹ کے عمل کو مکمل کرتے ہوئے منگل کو صوتی ووٹ کے ذریعہ 'فنانس بل 2021' منظور کیا وزیر خزانہ نرملا سیتارامن نے اس بل پر بحث کا جواب دیتے ہوئے کہا کہ فنانس بل نے ٹیکسوں کو منطقی اور آسان بنانے کی کوشش کی ہے اور انکم ٹیکس کی شرحوں میں کوئی تبدیلی نہیں کی گئی ہے۔ انہوں نے کہا کہ وزیر اعظم نریندر مودی خود ٹیکس بڑھا کر عوام پر بوجھ بڑھانے کے حق میں نہیں تھے لہذا بجٹ نے ٹیکسوں کو برقرار رکھنے کی کوشش کی ہے۔

انہوں نے کہا کہ معیشت کو فروغ دینے کے لیے کاروبار کرنے میں آسانی پر زور دیا گیا ہے اور اس کی تعمیل کے لئے بہت ساری اہم تبدیلیاں کی گئی ہیں۔ اس ترتیب میں پروڈکشن ڈیوٹی میں بھی تبدیلی کی گئی ہے۔



انہوں نے کہا کہ ٹیکس میں چھوٹ اور سرکاری شعبے کے بینکوں کی فنڈنگ ​​جیسے کچھ دیگر اہم تجاویز بھی بل میں پیش کی گئی ہیں اور انہیں اس کا حصہ بنایا گیا ہے۔

وزیر خزانہ نے جی ایس ٹی سے متعلق ممبروں کے سوالوں کے جواب دیتے ہوئے کہا کہ جی ایس ٹی وزارت خزانہ کا معاملہ نہیں ہے۔ جی ایس ٹی میں کوئی بھی فیصلہ جی ایس ٹی کونسل کرتا ہے اور وہ اس سے متعلق تبدیلیاں لا سکتا ہے۔ یہ کونسل ملک کی تمام ریاستوں کے نمائندوں پر مشتمل ہے اور انہیں تبدیلی کا حق ہے۔ ریاستی حکومتوں کو پیٹرول ڈیزل کی قیمتوں کو کم کرنے کے لئے کونسل کے اجلاس میں ایک تجویز پیش کرنی چاہئے۔ جی ایس ٹی میں بار بار تبدیلیاں ہوتی رہی ہیں اور تفصیلی تبادلہ خیال کے بعد اس کا فیصلہ کیا گیا ہے۔