کانگریس حکومت تلنگانہ میں CAA یا NRC کا نفاذ نہیں کرے گی: اتم کمار

حیدرآباد: تلنگانہ کے سول سپلائی اور آبپاشی کے وزیر اتم کمار ریڈی نے کہا کہ تلنگانہ میں کانگریس حکومت شہریت ترمیمی قانون (CAA) یا نیشنل رجسٹر آف سٹیزن (NRC) کو تلنگانہ میں لاگو نہیں کرے گی۔

2 اپریل بروز منگل کوداد میں ایک افطار پارٹی سے خطاب کرتے ہوئے اتم کمار ریڈی نے اس بات پر زور دیا کہ تلنگانہ میں کانگریس پارٹی کی اقتدار میں واپسی نے ریاست میں جمہوریت اور سیکولرازم کو بحال کیا ہے۔

اتم کمار ریڈی نے کہا کہ صرف کانگریس پارٹی ہی ہندوستان میں سیکولرازم اور جمہوریت کے تسلسل کی ضمانت دے سکتی ہے۔

انہوں نے کہا کہ صرف کانگریس ہی قومی سطح پر بی جے پی کا مقابلہ کرنے کی اہل ہے۔ بی جے پی اور نریندر مودی کی تیسری مدت کے لیے وزیر اعظم کے طور پر واپسی اقلیتوں بالخصوص مسلمانوں کے لیے سخت دھچکا ثابت ہوگی۔

انہوں نے مزید کہا کہ سخت مخالفت کے باوجود بی جے پی حکومت پہلے ہی سی اے اے کو نافذ کر چکی ہے۔ اگر بی جے پی دوبارہ جیت جاتی ہے تو امکان ہے کہ وہ این آر سی اور این پی آر کو متعارف کرائے گی۔ اس لیے ملک میں سیکولرازم کی حفاظت کے لیے لوگوں کو کانگریس



پارٹی کا ساتھ دینا چاہیے۔ تاہم، اگر راہول گاندھی وزیر اعظم بنتے ہیں تو وہ سیکولرازم اور جمہوریت کو برقرار رکھیں گے۔

وزیر نے بتایا کہ کانگریس پارٹی نے پہلے ہی تلنگانہ میں اقلیتوں کے لیے فلاحی اسکیمات شروع کی ہیں۔ انہوں نے کہا کہ وعدے کے مطابق اقلیتوں کی بہبود کے بجٹ کو بڑھا کر 4000 کروڑ روپے کیا جائے گا اور اقلیتوں کے لیے ایک ذیلی منصوبہ بھی لوک سبھا انتخابات کے بعد متعارف کرایا جائے گا۔

انہوں نے کہا کہ کانگریس حکومت نے اقتدار میں آنے کے 100 دنوں کے اندر اقلیتی بہبود سے متعلق تمام اداروں پر نامزدگیوں کو مکمل کیا۔ کانگریس حکومت نے تلنگانہ بھر میں رمضان کے مقدس مہینے کے لیے وسیع انتظامات کیے ہیں۔

انہوں نے کہا کہ دکانوں اور اداروں کو رات گئے تک کھلا رکھنے کی اجازت دی گئی ہے اور تمام سرکاری ملازمین کو افطار کے لیے ایک گھنٹہ پہلے نکلنے کی اجازت ہے۔

انہوں نے کہا کہ رمضان المبارک کا آخری عشرہ شروع ہو چکا ہے اور آئندہ 7 سے 8 دنوں میں عید الفطر منائی جائے گی۔ تمام لوگوں کو عید الفطر کی پیشگی مبارکباد دیتے ہوئے انہوں نے مسلمانوں سے کہا کہ وہ قوم بالخصوص تلنگانہ کی ترقی اور خوشحالی کے لیے دعا کریں۔