چیف منسٹرریونت ریڈی نے کلیانہ مستو اسکیم کاتخمینہ تیار کرنے کی عہدیداروں کو دی ہدایت

ذرائع:

حیدرآباد:چیف منسٹر ریونت ریڈی نے عہدیداروں کو ہدایت دی کہ وہ غریبوں کے لئے نقد رقم اور ایک تولہ سونا دینے کی کلیانہ مستو اسکیم کا تخمینہ تیار کریں۔

یہ ہدایات ہفتہ کو یہاں بی آر امبیڈکر سکریٹریٹ میں بی سی، اقلیتی اور قبائلی بہبود کے محکموں کے ساتھ میٹنگ کے دوران جاری کی گئیں۔اس میٹنگ میں بی سی ویلفیر کے وزیر پونم پربھاکر اور پنچایت راج و دیہی ترقیات کے وزیر ڈی انسویانے شرکت کی۔

میٹنگ کے دوران چیف منسٹر نے عہدیداروں سے کہا کہ وہ ہر پارلیمانی حلقہ میں ایک یونٹ کے طور پر بی سی اسٹڈی سرکل قائم



کرنے کےلئے ایک رپورٹ تیار کریں۔ انہوں نے عہدیداروں کو یہ بھی ہدایت دی کہ وہ ریاست میں تمام قسم کے سرکاری سماجی بہبود ہاسٹلوں کو چلانے کے لئے درکار جملہ بجٹ کا تخمینہ تیار کریں۔

ریونت ریڈی نے کہاکہ تخمینے کی بنیاد پر، حکومت گرین چینل کے ذریعے بجٹ جاری کرے گی۔

چیف منسٹر نے ریاست میں اقامتی اسکولوں کے بارے میں دریافت کیا اور کرائے کی عمارتوں میں چلائے جانے والے اسکولوں کے بارے میں معلومات حاصل کیں۔اسکولوں کے لئے ضروری مقامات پر اپنی عمارتوں کی تعمیر کے لئے زمین کی نشاندہی کریں اور اپنی عمارتوں کی تعمیر کے لیے تخمینہ تیار کریں۔